Episcopal City Deanery News

ನವೆಂಬರ್ ಮಹಿನ್ಯಾಚ್ಯಾ 13 ತಾರೀಕೆರ್, ಬ್ರೆಸ್ತರಾ ಸಾಂಜೆರ್ – ಉರ್ವಾ ಫಿರ್ಗಜ್ ಮಿನಿ ಹಾಲಾಂತ್ - ಕಥೊಲಿಕ್ ಸಭಾ ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚ್ಯಾ ನವೆಂಬರ್ ಮಹಿನ್ಯಾಚ್ಯಾ ಕಾರ್ಯಕಾರಿ ಸಮಿತಿಚ್ಯಾ ಜಮಾತೆರ್ - ಆಮ್ಚೊ ಕಥೊಲಿಕ್ ಸಭಾ ಕೇಂದ್ರಾಚೊ ತಶೆಂಚ್ ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚೊ ಮಾಜಿ ಅಧ್ಯಕ್ಷ್, ಪ್ರಸ್ತೂತ್ ಆಮ್ಚೆಂಚ್ ಎಂ.ಸಿ.ಸಿ ಬ್ಯಾಂಕಾಚೊ ಚೇರ್ ಮ್ಯಾನ್ , ವಲೇನ್ಸಿಯಾ ಘಟಕಾಚೊ ಮಾನೇಸ್ತ್ ಅನಿಲ್ ಲೊಬೊ ಪೆರ್ಮಯಿ ಹಾಂಕಾಂ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಸಮಿತಿ ಹಾಚೊ ಪ್ರಧಾನ ಕಾರ್ಯದರ್ಶಿ ಜಾವ್ನ್ 01.10.2025 ಹುದ್ದೊ ಲಾಬ್ಲೆಲ್ಯಾಕ್ , All India Catholic Union ಹಾಣಿಂ 19 ಸಪ್ಟೆಂಬರ್ 2025 ವೆರ್ ಆಮ್ಚ್ಯಾ ಸಮುದಾಯೆಂತ್ ಮಾನೇಸ್ತ್ ಅನಿಲ್ ಲೊಬೊ ಪೆರ್ಮಯಿ ಹಾಣೆಂ ಮಾಂಡೊನ್ ಹಾಡ್ಲ್ಯಾ ಕಾರ್ಯಯೋಜನಾಂಕ್ ಆನಿಂ “ಶ್ರೇಷ್ಟ್ ವೃತಿ ವಾವ್ರಾ”ಕ್ ಹಾಂಕಾಂ ಮಾನ್ ಫಾವೊ ಜಾಲ್ಯಾ ಸಂದರ್ಭಿಂ ಆನಿಂ ತಶೆಂಚ್ ಎಮ್.ಸಿ.ಸಿ ಬ್ಯಾಂಕಾಚೊ ಚೇರ್ ಮ್ಯಾನ್ ಜಾವ್ನ್ ಆಮ್ಚ್ಯಾ ವಾರಾಡ್ಯಾನ್, ಆಮ್ಚ್ಯಾ ಸಮುದಾಯೆಚ್ಯಾ ಯುವಜಣಾಂ ಖಾತಿರ್ ಮಾಂಡೊನ್ ಹಾಡ್ಲೆಲ್ಯಾ ‘ಪ್ರೇರಣ್ ಕ್ಯಾಚ್ ದೆಮ್ ಯಂಗ್’ ಯೋಜನಾಚ್ಯಾ ದುಸ್ರ್ಯಾ ಹಂತಾಚ್ಯಾ ತರ್ಭೆತಿ ಶಿಬಿರಾಕ್ – ಮಹಾ ಪೋಷಕ್ ಜಾವ್ನ್ ಧಾನ್ ದಿಲ್ಲ್ಯಾ ಸಂಧರ್ಬಿ – ಅಮ್ಚ್ಯಾ ಕಥೊಲಿಕ್ ಸಭಾ ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚ್ಯಾ ತರ್ಫೆನ್ ಮಾನೇಸ್ತ್ ಅನಿಲ್ ಲೋಬೊ ಫೆರ್ಮಯ್ ಹಾಂಕಾಂ ಸನ್ಮಾನ್ ಕಾರ್ಯೆಂ ಚಲೋವ್ನ್ ವೆಲೆಂ.

ಸನ್ಮಾನ್ ಕಾರ್ಯ ಸಂಧರ್ಭಿಂ ವೇದಿರ್ ಉರ್ವ ಫಿರ್ಗಜ್ ವಿಗಾರ್ ಬಾಪ್ – ಮಾ ಬಾ ಬೆಂಜಮಿನ್ ಪಿಂಟೊ, ಕಥೊಲಿಕ್ ಸಭಾ ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚೆ ಅತ್ಮಿಕ್ ನಿರ್ದೇಶಕ್ ಮಾನಾದಿಕ್ ಬಾಪ್ ಜೋನ್ ವಾಸ್, ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚಿ ಅಧ್ಯಕ್ಷ್ ಮಾನೆಸ್ತಿಣ್ ಐಡಾ ಫುರ್ಟಾಡೊ, ಕಾರ್ಯದರ್ಶಿ ಮಾನೆಸ್ತ್ ರೋಹನ್ ಎಲ್ ಸಿಕ್ವೇರಾ, ನಿಕಟ್ ಪೂರ್ವ ಅಧ್ಯಕ್ಷ್ ಮಾನೆಸ್ತ್ ಸ್ಟೀವನ್ ರೊಡ್ರಿಗಸ್, ಖಜನ್ದಾರ್ ಮಾನೆಸ್ತಿಣ್ ಜೆಸಿಂತಾ ಲೋಬೊ ತಶೆಂಚ್ ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚೆ ಸರ್ವ್ ಹುದ್ದೆದಾರಾನಿಂ ಸಾಂಗಾತಾ ಮೆಳುನ್ ವಾರಾಡ್ಯಾ ತರ್ಫೆನ್ – ಮಾನೆಸ್ತ್ ಅನಿಲ್ ಲೋಬೊ ಹಾಂಕಾಂ ಫುಲಾಂ ತುರೊ ದೀವ್ನ್ ಶಾಲ್ ಪಂಗ್ರೊನ್ ಮಾನ್ ಕೆಲೊ.

ಮಾನ್ ಸ್ವೀಕಾರ್ ಕೆಲ್ಯಾ ಮಾನೇಸ್ತ್ ಅನಿಲ್ ಲೋಬೊನ್ ಸಭೆಕ್ ಉದ್ದೇಶಿಸೊನ್ ಅಪ್ಲೊ ಸಂದೇಶ್ ದೀವ್ನ್ – ಯುವಜಣಾಂಕ್ ಬರ್ಯಾ ಫುಡಾರಾಕ್ ಪಾವೊಂಕ್ – ತ್ಯಾ ಪಯ್ಕಿ ಸರ್ಕಾರಿ ಕಾಮಾಂ ಲಾಬೊನ್ ಚಡಿತ್ ರಿತಿನ್ ಸರ್ಕಾರಿ ಕ್ಷೇತ್ರಾನಿಂ ಆಮ್ಚ್ಯಾ ಸಮುದಾಯೆಚ್ಯಾ ವ್ಯಕ್ತಿನಿಂ ಮಾನ್ ಜೋಡ್ನ್ ಘೆಂವ್ಕ್ ಪ್ರೇರಿತ್ ಕರ್ಚ್ಯಾ – ‘ಪ್ರೇರಣ್ ಕ್ಯಾಚ್ ದೆಮ್ ಯಂಗ್’ ಯೋಜನ್ ಎಕ್ ಉತ್ತೀಮ್ ತಶೆಂಚ್ ಮಹತ್ವಾಚೆಂ ಯೋಜನ್. ಕಥೊಲಿಕ್ ಸಭೆಚ್ಯಾ ಧ್ಯೇಯಾಕ್ ಹೆಂ ಎಕ್ ಲಗ್ತಿಂ ಜಾಲ್ಲೆಂ ಯೋಜನ್ ಅನಿಂ ವಾವ್ರ್. ಹ್ಯಾ ಯೋಜನಾಕ್ ಎಮ್.ಸಿ.ಸಿ. ಬ್ಯಾಂಕ್ ತಶೆಂಚ್ ಸಗ್ಳ್ಯಾ ಕ್ರಿಸ್ತಾಂವ್ ಸಮುದಾಯೆನ್ ಸಾಂಗಾತ್ ಅನಿಂ ಪಾಟಿಂಬೊ ದಿಂವ್ಚೆಂ ಬೋವ್ ಗರ್ಜೆಚೆಂ ಮ್ಹಣ್ ಅಪ್ಲಿ ಅಭಿಪ್ರಾಯ್ ಉಚಾರ್ಲಿ. ಕಥೊಲಿಕ್ ಸಭಾ ಕೇಂದ್ರಿಯ್ ಹಂತಾರ್ ಅಪ್ಣಾಚ್ಯಾ ಆವ್ದೆ ವೆಳಾರ್ ಕಥೊಲಿಕ್ ಸಭೆಚ್ಯಾ ಸಬಾರ್ ಕ್ಷೇತ್ರಾಂಕ್ ಬದ್ಲಾವಣೆಚೊ ವೇಳ್ ಹಾಡೊಂಕ್ –ಜಾಂವ್ ತೆಂ ಕಥೊಲಿಕ್ ಸಭೆಚೆಂ ವೊಳ್ಕೆ ಕಾರ್ಡಾಂ, ಲೇಖ್ ಪಾಕ್ ಅಡಿಟ್, ಕಾರ್ಯವೋಳ್, ಸಭೆಚೆಂ ಘಟನಾ ವೊಳ್ - ಸಂವೀಧಾನ್ ತಿದ್ವೊಣಿ ತಶೆಂಚ್ ಹೆರ್ ಮಹತ್ವಾಚಿಂ ಕಾಮಾಂ ಅಪ್ಲ್ಯಾ ಮುಖೆಲ್ಪಾಣಾರ್ ಬರ್ಯಾನ್ ಸಭೆರ್ ಮಂಡನ್ ಕರ್ನ್ ಜಾರಿಯೆಕ್ ಹಾಡ್ಲೆಲೆಂ ಅಪ್ಣಾಕ್ ವ್ಹರ್ತ್ಯಾ ದಾದೊಸ್ಕಾಯೆಚೆಂ ಜಾವ್ನ್ ಅಸ್ಲೆಂ ಮ್ಹಣನ್ ಸಂತೋಸ್ ಉಚಾರ್ಲೊ. ತಶೆಂಚ್ ರಾಜಕೀಯ್ ಕ್ಷೇತ್ರಾಂತ್ ಆಮ್ಚೆ ಮುಖೆಲಿ ಜಾಯ್, ತಾಣಿಂ ಮುಖಾರ್ ಯೇಜಾಯ್ ತರ್ ಆಮ್ಚ್ಯಾ ಸಮುದಾಯೆಚ್ಯಾ ಲಾಯಿಕ್ ತಶೆಂಚ್ ದಾರ್ಮಿಕ್ ವ್ಯಕ್ತಿಂಚೊ ಸಾಂಗಾತ್ ಖಂಡಿತ್ ಜಾವ್ನ್ ಜಾಯ್, ತಶೆಂಚ್ ಲಾಯಿಕ್ ಸಮುದಾಯೆಚ್ಯಾ ಮುಖೆಲ್ಯಾನಿಂ ಕಸಲೀಯ್ ಚೂಕ್ ಅಧಾರ್ಲ್ಯಾ ವೆಳಾರ್ ತಾಂಕಾ ಚೊಡ್ ದೊಡ್ ಕರ್ನ್ ತಾಂಚ್ಯೊ ಚುಕಿ ತಿದ್ವೊನ್ ಮಾರ್ಗದರ್ಶನ್ ಕರ್ಚೆಂ ಆಮ್ಚ್ಯಾ ಸಮುದಾಯೆಚೆಂ ಲಕ್ಷಣ್ ಜಾಯ್ಜಯ್ – ತೆದಾಳಾಂ ಆಮ್ಚ್ಯಾ ಸಮುದಾಯೆಚೆ ಮುಖೆಲಿ ಹ್ಯಾ ಸಮಾಜೆಂತ್ ಮುಖಾರ್ ಯೇವ್ನ್ ಕಾರ್ಯನ್ಮುಕ್ ಜಾಂವ್ಕ್ ಸಾಧ್ಯ್ ಜಾತಾ ಮ್ಹಳ್ಳೊ ಸಂದೇಶ್ ತಾಣಿಂ ದಿಲೊ.

ಸನ್ಮಾನ್ ಕಾರ್ಯಾಚೆಂ ಕಾರ್ಯನಿರ್ವಾಹಕ್ ಎಪಿಸ್ಕೊಪಲ್ ಸಿಟಿ ವಾರಾಡ್ಯಾಚ್ಯಾ ಕಾರ್ಯದರ್ಶಿ ಮಾನೆಸ್ತ್ ರೋಹನ್ ಲಾರೆನ್ಸ್ ಸಿಕ್ವೇರಾ ಹಾಣೆಂ ಕೆಲೆಂ. ವಾರಾಡೊ ಅಧ್ಯಕ್ಷ್ ಮಾನೆಸ್ತಿಣ್ ಐಡಾ ಫುರ್ಟಾಡೊ ಹಿಣೆಂ ವಂದಿಲೆಂ. ಖಜನ್ದಾರ್ ಮಾನೇಸ್ತಿಣ್ ಜೆಸಿಂತಾ ಲೋಬೊ ಆನಿಂ ನಿಕಟ್ ಪೂರ್ವ ಅಧ್ಯಕ್ಷ್ ಸ್ಟೀವನ್ ರೊಡ್ರಿಗಸ್ ಹಾಣಿಂ ಸನ್ಮಾನ್ ಕಾರ್ಯಾಚಿ ತಯಾರಾಯ್ ಕೆಲಿಂ.