City Deanery News

ಕಥೊಲಿಕ್ ಸಭಾ ಮಂಗ್ಳುರ್ ಪ್ರದೇಶ್ (ರಿ), ಆಂಜೆಲೊರ್ ಘಟಕಾನ್ ಫಿರ್ಗಜೆಚ್ಯಾ ಸಾಮಾಜಿಕ್ ಅಭಿವೃದ್ಧಿ ಆಯೋಗ್ ತಶೆಂಚ್ ನೀತ್ ಆನಿ ಶಾಂತಿ ಆಯೋಗಾಚ್ಯಾ ಸಹಯೋಗಾನ್ ಫೆಬ್ರವರಿ 1, 2026 ವೆರ್ ಸಕಾಳಿಂ 10.30 ವರಾರ್ ಗೋಲ್ಡನ್ ಜ್ಯುಬಿಲಿ ಮೆಮೋರಿಯಲ್ ಹೊಲಾಂತ್ ಪೋಲೀಸ್ ಜನಸಂಪರ್ಕ ಸಭೆ ಮಾಂಡುನ್ ಹಾಡ್-ಲ್ಲಿ. ಕಾರ್ಯಕ್ರಮಾಚೊ ಅಧ್ಯಕ್ಷ್ ಜಾವ್ನ್ ಫಿರ್ಗಜ್ ವಿಗಾರ್ ಮಾ. ಬಾ. ಫ್ರೆಡ್ರಿಕ್ ಮೊಂತೇರೊ, ಉಲವ್ಪಿ ಜಾವ್ನ್ ದಕ್ಷಿಣ್ ವಲಯಾಚಿ ಸಹಾಯಕ್ ಪೋಲಿಸ್ ಕಮಿಷನರ್ ಕುಮಾರಿ ವಿಜಯಕ್ರಾಂತಿ, ಮಂಗ್ಳುರ್ ನಗರ್ ಪೋಲಿಸ್ ಠಾಣ್ಯಾಚೊ ಉಪನಿರೀಕ್ಷಕ್ ಮಾನೆಸ್ತ್ ಶಿವಕುಮಾರ್, ವೆನ್ಲಾಕ್ ಆಸ್ಪತ್ರೆಚ್ಯಾ ಆಯುಷ್ ವಿಭಾಗಾಚೊ ಡಾ. ಪ್ರಕಾಶ್ ಎ. ಜೆ., ಮೆಸ್ಕಾಂ ಮರೋಳಿ ವಿಭಾಗಾಚೊ ಸಹಾಯಕ್ ಕಾರ್ಯೆಂ ನಿರ್ವಾಹಕ್ ಇಂಜಿನಿಯರ್ ಮಾನೆಸ್ತ್ ಶಿವಪ್ರಕಾಶ್, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಮಾನೆಸ್ತ್ ರೋಶನ್ ಪತ್ರಾವೊ ಆನಿ ಕಥೊಲಿಕ್ ಸಭಾ ಆಂಜೆಲೊರ್ ಘಟಕಾಚೊ ಅಧ್ಯಕ್ಷ್ ಮಾನೆಸ್ತ್ ಆಲ್ಬರ್ಟ್ ಲಸ್ರಾದೊ ವೆದಿರ್ ಹಾಜರ್ ಆಸ್-ಲ್ಲೆ.

ಜಮ್ಲೆಲ್ಯಾಂಕ್ ಉದ್ದೇಸುನ್ ಉಲಯಿಲ್ಲ್ಯಾ ವಿಗಾರ್ ಬಾಪ್ ಫ್ರೆಡ್ರಿಕ್ ಮೊಂತೇರೊನ್ ಲೊಕಾಚೆ ಸಮಸ್ಯೆ ಪರಿಹಾರ್ ಕರ್ಚೆ ಥಂಯ್ ಮಂಗ್ಳುರ್ ಶಹರಾಚ್ಯಾ ವಿವಿಧ್ ಸರ್ಕಾರಿ ಇಲಾಖ್ಯಾಂಚ್ಯಾ ಅಧಿಕಾರಿಂನಿ ದಾಖಂವ್ಚಿ ಆಸಕ್ತ್ ವಾಖಣ್ಲಿ.

ಸಹಾಯಕ್ ಪೋಲಿಸ್ ಕಮಿಷನರ್ ವಿಜಯಕ್ರಾಂತಿನ್ ಸೈಬರ್ ಕ್ರೈಮಾ ವಿಶ್ಯಾಂತ್ ಉಲವ್ನ್ ಹ್ಯಾ ಜಾಳಾಂತ್ ಸಾಂಪಡ್ನಾಶೆಂ ಲೊಕಾನ್ ಕಸಲಿ ಜಾಗ್ರುತ್ಕಾಯ್ ಸಾಂಬಾಳುಂಕ್ ಜಾಯ್ ಮ್ಹಣ್ ಮಾಹೆತ್ ದಿಲಿ. ತಶೆಂಚ್ ಯುವಜಣಾಂ ಮಧೆಂ ಚಡೊನ್ ಯೆಂವ್ಚ್ಯಾ ಮಾದಕ್ ದ್ರವ್ಯಾಂ ಸೆವನಾ ವಿಶಿಂ ಜಾಗ್ವಣ್ ದೀವ್ನ್ ವ್ಹಡಿಲಾಂನಿ ಭುರ್ಗ್ಯಾಂಚೆರ್ ಕಶಿ ನದರ್ ದವರಿಜಾಯ್ ಮ್ಹಣ್ ಮಾಹೆತ್ ದಿಲಿ.

ವೆನ್ಲಾಕ್ ಆಸ್ಪತ್ರೆಚ್ಯಾ ಆಯುಷ್ ವಿಭಾಗಾಂತ್ ಲೊಕಾಕ್ ಮೆಳ್ಚ್ಯಾ ಸವ್ಲತ್ಯಾಂ ವಿಶ್ಯಾಂತ್ ಡಾ. ಪ್ರಕಾಶ್ ಎ. ಜೆ. ಹಾಣೆಂ ಮಾಹೆತ್ ದಿಲಿ ಆನಿ ಧರ್ಮಾರ್ಥ್ ಲಾಭ್ಚ್ಯಾ ಹ್ಯಾ ಸೆವೆಚೊ ಫಾಯ್ದೊ ಜೊಡುಂಕ್ ಉಲೊ ದಿಲೊ.

ಜಮ್ಲೆಲ್ಯಾಂಕ್ ಉದ್ದೇಸುನ್ ಉಲಯಿಲ್ಲ್ಯಾ ಮೆಸ್ಕಾಂ ಸಹಾಯಕ್ ಕಾರ್ಯೆಂ ನಿರ್ವಾಹಕ್ ಇಂಜಿನಿಯರ್ ಮಾನೆಸ್ತ್ ಶಿವಪ್ರಕಾಶಾನ್ ಮೆಸ್ಕಾಂ ಇಲಾಖ್ಯಾಕ್ ಸಂಬಂಧ್ ಜಾಲ್ಲ್ಯಾ ಲ್ಹಾನ್-ಲ್ಹಾನ್ ಸಮಸ್ಯಾಂಕ್ ಲೊಕಾನ್ ಕಸೊ ಸುಲಭಾಯೆನ್ ಪರಿಹಾರ್ ಜೊಡ್ಯೆತ್ ಮ್ಹಣ್ ಮಾಹೆತ್ ದಿಲಿ.

ಉಪ್ರಾಂತ್ ಜಮ್ಲೆಲ್ಯಾಂಕ್ ಸವಾಲಾಂ ವಿಚಾರುಂಕ್ ಅವ್ಕಾಸ್ ಕರ‍್ನ್ ದಿಲೊ ಆನಿ ಸಂಬಂಧ್ ಜಾಲ್ಲ್ಯಾ ಇಲಾಖ್ಯಾಚ್ಯಾ ಅಧಿಕಾರಿಂನಿ ತಾಂಚ್ಯಾ ಸವಾಲಾಂಕ್ ಜಾಪಿ ದಿಲ್ಯೊ.

ಹ್ಯಾ ಸಭೆಂತ್ ಮಂಗ್ಳುರ್ ನಗರ್ ಪೋಲಿಸ್ ಠಾಣ್ಯಾಚಿ ಸಿಬ್ಬಂದಿ, ಮೆಸ್ಕಾಂ ಅಧಿಕಾರಿ, ಸಾಂ. ಲುವಿಸ್ ಕೊಲೆಜಿಚಿ ಡೀನ್ ಡಾ. ರೋಜ್ ವೀರಾ ಡಿ’ಸೋಜಾ, ಸಾಮಾಜಿಕ್ ಕಾರ್ಯಕರ್ತ್ ಮಾನೆಸ್ತ್ ಜಿ. ಕೆ . ಭಟ್ ಹಾಜರ್ ಆಸ್-ಲ್ಲೆ. ಸಭೆಂತ್ ಲಗ್ಭಗ್ 250 ಜಣಾಂನಿ ವಾಂಟೊ ಘೆತ್ಲೊ.

ಕಥೊಲಿಕ್ ಸಭೆಚೊ ಅಧ್ಯಕ್ಷ್ ಮಾನೆಸ್ತ್ ಆಲ್ಬರ್ಟ್ ಲಸ್ರಾದೊನ್ ಜಮ್ಲೆಲ್ಯಾಂಕ್ ಸ್ವಾಗತ್ ಕೆಲೊ. ನೀತ್ ಆನಿ ಶಾಂತಿ ಆಯೋಗಾಚೊ ಸಂಚಾಲಕ್ ಮಾನೆಸ್ತ್ ಮನೋಹರ್ ಸಲ್ಡಾನಾನ್ ಧನ್ಯವಾದ್ ಅರ್ಪಿಲೆ. ಮಾನೆಸ್ತಿಣ್ ಲೊಲಿನಾ ಡಿ’ಸೋಜಾನ್ ಕಾರ್ಯೆಂ ಚಲವ್ನ್ ವ್ಹೆಲೆಂ.